Am 24.05.2014-10 Jahre time2dance

Wir haben am 24. Mai 2014 gefeiert!

Bereits 10 Jahre gibt es time2dance. Und es sollen noch ganz viele weitere Jahre werden!
Seit dem 1. Januar 2014 nun als time2dance gmbh.

Wirf einen Blick in unsere Jubiläumsparty oder lies unten die Worte von Lotty Rietschin zu 10 Jahren time2dance und dem Schaffen von Barbara Ruf. In astreinem "Baseldytsch"...

Liebi Barbara, vereehrti Gescht

Scheen ass ihr ko sin zue däm Fescht.

Ganz härzlig mecht ich eych begriesse

Und hoff, ihr kennet s alli gniesse

uff em Pargett. So lang er wänd,

zue Muusig von-ere spitze Bänd.

Eb d Deen modärn, nostalgisch alt,

s losst niemerts in däm Saal do kalt.

D Fraid am Danze, d Muschter, d Schritt

wäre, (fliegsch nit us em Taggt), dr Hit.

Doch? Tanzt me n uf s zwai bim Discofox?

Git s bym Rumba s Ai oder d Box?

„Halt, nai bisch falsch!“ „Kumm loss die fiehre!“

„Jetzt Out side change, muesch nid studiere!“

„Zerscht New Yorker, denn d Dame drille.“

„Ich fiehr, drum got s nit no dym Wille!“

Wär kennt sie nit, so Diskussioone,

Wort – Gfächt, wo sich ganz nit lohne.

S heisst nit umsunscht: „Vo nit kunnt nit!“

Drum nimm dr halt fir s Danze Zyt.

Hol dr Root und gang in d Stund,

bi time2dance! Ersch denn lauft s rund.

Zäh Joor Danzschuel, liebi Gescht,

zäh Joor Barbara, drum dyy Fescht.

A Dream of Dance, what Celebration!

Dear Barbara: „Congratulation“.



E jede Gascht, so ha mer dänggt, kennt die Gschicht interessiere

und ha drum haimlig, hindeduure afo recherschiere.

E Noomidaag bin i sogar bim Trudi Schmucki in dr Stuube gsässe,

ha mr Notize gmacht, was sie verzellt, zem s nit z vergässe.

Au d Barbara het mit mir verbarme, und duet mr d Unterlage schigge.

So han i mit dämm Wisse, die näggschte Värsli kenne schtrigge.

Noo der Schnyderlehr ereffnet d Babs mit Sälbschtvertaue und vyyl Muet,

mit vierezwanzig Joor ihr Couture Atelier, und s Gschäft lauft guet.

Doch haimlig het sie scho mit ninzäh ihri grossi Liideschaft entdeggt,

Danze mecht sie lehre. Und zwoor richtig. Het d Megligkaite tscheggt.

Sie startet in dr Tanzschuel Kaiser. Si büfflet Tango, Jive,

und gschpyyrt und wais: Daas bruuch ich, das git mym Lääbe Drive.

Si losst nit lugg, sie iebt, trainiert, nyt anders miech si lieber,

wenn s sy muess näbe Night Club two Step, Foxtrott, Marsch au Schieber.

Eb Samba Walks, eb Cuban rocks, eb Sway sie lehrt wie gschteert.

Haltig, Wave und s Footwork stimme. Sin jetze nimm vekehrt.

No drey Joor Kaiser het d Babs gfunde, s wär ändlig lagsam Zyt,

I need a brand new challenge. I glaub, i by soo wytt.



S git numme n ai Adrässe, wo Top isch und first Class,

d Danzschuel Trudi Schmucki, die an dr Schoffelgass.

No dr erschte Sichtigsrundi, maint s Trudi sehr salopp:

„Lehr aifach zerscht emoole Danze, was zaigt hesch, isch e Flopp.

Und richtig wirsch das gar nie kenne, do brucht s e weneli meh!

Bly by dynere Schnyderei. So long! Mr hän is gseh.“

Doch Babs, die wär nit d Barbara, sie insistiert bim Trudi

Und meint: „Denn bring mr s Danze by! Du d Lehrere - ich di Studi!“

E Draum wird wohr uf em Pargett. Dr Start in d Profiszene.

Sie leitet Kirs, macht Witterbildig. Sie danzt und tout va bene.

Dr Schmucki Saal, glai aber cosy, het, wenn me so dra dänggt,

trotz em Mass vo Tischduechgressi, zem Danze herrlig glängt.

Im ninzähhundertsägseninzig, in ihrer Tanzkarriere,

Durchbricht d Babs, was e Novum isch, es wichtigi Barriere.

Sie bietet Kirs für „Gay Dance“ a. Der Erscht, ha ni y vernoh,

syg uusbuecht gsy. Wird dopplet gfiehrt. In Schaare sin sy ko.

D Comunity isch gliggig gsy. Das Aagebot isch gschtande.

Du Barbara hesch d Lanze broche, fir uns im „Schweizer Lande.“

In Ziiri sin im Joor zwaidausig, d Eurogames dr Hit.

Zem Tanzturnier in Eerlike, schleppt d Barbara uns mit.



No däm Event wird allne klar, Turniertanz wän mr lehre.

So isch e neye Kurs entstande, mr kenne uns nit wehre.

Au s Trudi hilft is, d Standart Dänz, do muess si viel poliere

„Ihr Frau! Lehred ändlig Folge statt immer sälber Fiehre.“

Denn sin mr no Hanover pilgeret, e stattlig grossi Gruppe

und dien uns, nai, wär hät das dänggt, ass Winner Team entpuppe.

Kräftig sammle mr Medaille, und s Trudi griegt en Orde,

as „Ältschti“ vo de n Eurogames, isch sie uusgwählt worde.

By Eurogames danze no hitte au Schwyzer ufs Podescht.

Die Situation wär hyt nit soo, hätt d Barbara, - wärti Gescht,

nit dr Muet gha, synerzyt, ins Gaydance z investiere.

Danggscheen Babs, dasch di Applaus, das mecht i honnoriere.

All die Joor het Barbara mit Ehrgyz, Flyss und feschtem Wille,

Theorie und Schrittfolg büfflet, im Tanzsaal, au im Stille.

Professionell dr Unterricht, fundiert sin d Lektione.

Si motiviert, isch voll Entrain, die Tanzstund dien sich lohne.

Sie fiehrt d Schieler klar didaktisch und gschiggt ibers Parkett,

sogar e Mensch mit lingge Fiess het Frayd, (i mach e Wett).

Är bsuecht dr Kurs, är losst nit lugg, het Gspass in jedre Stund.

Und maint: „Bewegig, Rhythmus, s Danze, macht mi aifach gsund.“



Ass d Babs hyt doo stoht, wo si isch, kunnt nit vo ungefähr,

sie het s nit im Draum bekoo, das wär e beesi Mähr.

Dangg ihrer Uusduur, dangg em Trudi, wo d Barbara kontrolliert,

entdeggt sie Fähler, konsequänt, die, sofort korrigiert.

Ihre Riichtum an Erfaarig, s ganz Wisse um s Wort: Dance

Die Trouvaille isch par excelence, für Babs e riese Chance.

An d Tanzkongräss wird Barbara gschleppt, ins Ussland, nota bene.

S Trudi dräggt: „Mach s Lizänsiat im Standart. In dr Szene

vom Schwyzer Danz bruchsch das Diplom. Denn hesch e guete Name.

Die Anerkennig, die isch s Wichtigscht”, maint die ältri Dame.

So hän sich die zwei Power-Fraue, mitnander arrangiert,

und s Resuldat vo däne zwai, si hän voll reüssiert.

Iber vierzäh Joor het Barbara, zämme mit em Trudi,

mitgwirggt an der Schoffelgass, jetzt usgleert, nimm as Studi.

Im Joor zwaidausig plus e zwai, do got en Aera z Änd,

d Danzschuel Schmucki gits jetz nimm, es fiehre n andri Händ.

Ney haisst die alti Tanzschuel jetze: Aifach: Barbara Ruef.

Und d Babs het s Ziel vom Draum erreicht in ihrem gliebte Bruef.

Bald aber kunnt e neye Draum, d Idee isch krass, verwääge

E grosse Saal schwäbt ihr vor Auge und kämere guet gläge.



Sie suecht und wird den ändlig findig, e Bijou vo Lokal.

Das Aagebot, das muess sie ha, sy het kai andri Wahl.

„Bisch jetz verruggt, wäg vo dr Schtadt, do wirsch nie reusiere!“

und witter dehnts: „Do kunnt kai Mensch, das wird die ruiniere!“

Doch d Barbara isch schtuur, zaigt Standing. Sie zieht dr Umzug duure.

Am 1. Mai zwaidausigvier wird ziiglet, ohni z muure.

D Barbara ka sich gligglig schätze, eb Hetero, eb Gay

Triffsch alli an de Partys a, me danzt doch mit de Bay,

dr Räscht isch wurscht, denn s Wichtigscht doo isch d Stimmig.

Wär interresiert s bym Danze denne. S frogt kain, wie isch dii Gsinnig?

Dyni Tanz Event sind Klasse,

hän Pep und au viel Rasse

Au s jingschte Kind an dynre Schuel, het sich scho etabliert,

e Fitness Danze, fyr uns Alte. Ich ha s scho usprobiert.

Everdance, for d Silverdancers, das wär e Spot-turn wärt,

und doo dermit wär d Haltig in däm Danzkurs au erklärt.



Mr hän die Danzschuel schätze glehrt, e wunderscheene n Ort.

Gnueg Platz zem Danze und zem Sitze, zem wäggsle e paar Wort.

Ganz ebbis speziells isch d Bar, do läbt me denn s „Chill out“

Spendiert dr Liebschte no e Drink, we me sich das gedraut.

Lueg an d Wänd, dert kasch entdegge,

Diplom wo in de Rähme stegge,

Si zaige uns, die Frau hets grafft,

ihr Zyl zereicht. Das het sie gschafft.

Danze fyr e Lääbeshaltig,

Barbara: Chapeau, ich find s das gwaltig.

You had a Dream, a fantasy

You put it in reality!

Liebi Barbara, liebi Gescht

Mir wintsche dir firs Juubelfescht

und au fir d Zuekunft, numme s Bescht.

Mr nämme s Glas und stoos n aa

Uf time2dance und d Barbara.